Aik raat ki kharab neend Blood Pressure ko barha deti hai

Aik Raat ki Kharab Neend Blood Pressure ko barha deti hai

Aik raat ki kharab neend na sirf jismani thakawat aur chirchiray pan ka baais banti hai balkay is ke nateejay mein Blood Pressure bhi barhta hai jis ka assar aglay din tak barqarar rehta hai.

Yeh baat america mein honay wali aik tibbi tahaqeeq mein samnay aayi. Arizona University ki tahaqeeq mein naaqis neend aur khoon ki sharianon se jurey amraaz ke darmain talluq ka jaiza liya gaya.

Tahaqeeq ke douran 21 se 70 saal ki umar ke 300 mardon aur khawateen ka jaiza liya gaya jin mein amraaz qalb ki koi tareekh nahi thi.

2 din tak in afraad ke Blood Pressure ko musalsal monitor kya gaya aur maloom huwa ke jo log kam sonay ke aadi they un ka Blood Pressure barh gaya jabkay aglay din bhi Blood Pressure reading mein izafah record kya gaya.

Mohqiqeen ka kehna tha ke Blood Pressure khoon ki sharianon ke amraaz ki pishgoyi ke liye ahem tareen ansar hai aur maazi mein yeh baat samnay aa chuki hai ke neend ki kami aur amraaz qalb se amwaat ke darmain talluq mojood hai.

Unhon ne munasib neend ki ahmiyat par zor dete hue kaha ke 7 ghantay ki achi mayaari neend ke zariye Blood Pressure ko control mein rakhna mumkin hai jis se heart attack aur falij ka khatrah kam hota hai.

Is tahaqeeq ke nataij tibbi jareeday Psychosomatic Medicine mein shaya hue.

Is se pehlay rawan saal ke aaghaz mein spain ke spanish national research council for research ki tahaqeeq mein bataya gaya ke 6 ghantay se kam neend se khoon ki sharianon se jurey amraaz ka khatrah 35 fisad tak barh jata hai.

Neend ki kami se khoon ki sharianon mein aisa mawaad jama honay lagta hai jo anhn tang aur sakht banata hai.

Tahaqeeq mein daryaft kya gaya ke achi neend amraaz qalb ke ilaj ke liye makhsoos adwiyaat ke muqablay mein ziyada taiz aur sasta tarika car hai.

Leave a Reply

Your email address will not be published. Required fields are marked *